Paytaxt Bakıdan 28 kilometr aralıda, Qaradağ rayonunun Sahil qəsəbəsində yeni şəhər salınır. Xəzər adaları (“Khazar İslands”) adlanan şəhərin əsas hissəsi Xəzər dənizində yaradılan 50-yə yaxın süni adada yerləşəcək. Artıq mətbuatda bu şəhərdə ucaldılacaq Azərbaycan qülləsinin 1050 metr hündürlükdə olacağı barədə məlumatlar yayılıb.
Yeni şəhərdə artıq iki ildir tikinti gedir. Yaşayış binaları tikilir, yollar çəkilir. Fəhlələrin dediyinə görə, prezidentin gəlişi gözlənildiyindən yolların çəkilişi sürətlənib.
Ərazidəki iş icraçılarının dediyinə görə, tikinti işlərinə 2010-cu ildən başlanıb. Yolun Bakı-Astara magistralına yaxın bir hissəsinə artıq asfalt döşənib. Dəniz həmin ərazidə bir neçə kilometr doldurulub. Şəhər hələ dənizin içərisinə doğru daha 8 kilometr uzanacaq.
Dənizin torpaqla doldurulmuş hissəsində bir-neçə yaşayış binası tikilməkdədir.
Şəhərin digər bir hissəsində isə restoranlar, əyləncə mərkəzləri, ictimai-iaşə obyektləri tamamlanmaq üzrədir. Yeni şəhərə gedəcək yolların kənarına isə bir neçə cərgə iri palma ağacları əkilib.
Yeni salınan şəhərin ərazisi 2 min hektarı əhatə edir. Şəhərcik “baş” adadan, iki paralel xətlə uzanan tikililərdən, çoxmərtəbəli binalar və villalar üçün ayrıca irili-xırdalı adalardan ibarətdir. Kompleksi 20-yə yaxın körpü birləşdiriləcək.
Layihənin maliyyə tərəfinə gəldikdə isə «Khazar Islands» təqribən 100 mlrd. ABŞ dollarına başa gələcək. Bunu «APA-ECONOMICS»ə «Khazar Islands» layihəsini inşa edən «Avesta» konserninin prezidenti Hacı İbrahim Nehrəmli bildirib.
Dənizdə süni arxipelaq üzərində salınacaq «Khazar Islands» 19 mikrorayondan ibarət olacaq. Adaların bulvar xəttinin ümumi uzunluğu 50 km-ə çatacaq.
